• MyPassion
Uçazuğaşi Didi Thaqimepe
01/01/2001 01:00

Super-ligis, ma mşunnati P̆olişi t̆ak̆imepek ojvarapaman. Galatasarayi Avropaşati jur k̆upa komoğu. UEFA-şi şampioni diu do ar do Avropaşi super-k̆upa komoğu Turkieşa. 

Uçazuğaşi t̆ak̆imepeşi irişen k̆ai Trabzonspori ren. Aşi fara şampioni na ivu Trabzonsporişi şampionobapeşk̆ule dido ora golaxtu. Ma k̆upa  na ezdes va miz̆irun.1983-84 ǯanas ivudort̆u do himorape çkuni Lazonaşi dido svalepes kyona do televizyoni var rt̆u. 2010-11-s na ibirinu ǯana Trabzonspori, şampioni ma vore-ya zop̆ons do him ǯanas TFF-k Fenerbahçes k̆upa komeçu, si ore şampioni-ya do. Mara goǯos Fenerbahçeşi başkani do didope polisik oç̆opu do komolvoxunu. Tkva meşağeri-moşağeri şampioni ivit, itkvinen-ya do UEFA-k ham dulyaşi k̆arari meçasis goǯoneri şampioni mi ren, him oras iri-xolos dugurinanen.

Ar do Uçazuğaşi t̆ak̆imi Rizespori koren. Super-ligi na gyoz̆in yerişa ar yulun, ar gyulun. Melaşk̆ule tudeni ligişe jinşi ligişa dido yano yalen. Turkieş futbolişi ligepes borci na var uğun, mtelişen mboli genç̆areri na uğun k̆lubi na ren Rizesporişeni, ÇAYKUR-ik çaişa para mek̆vatums do ham para k̆lubişa ulun. Haşo rennati p̆ot̆e super-ligi na var açodinu k̆lubik ǯo xolo super-ligişa kextu. Rizesporik k̆ai futbolcepe eç̆opaseni-ya do na uondramt̆espes guris gyut̆inu. Haǯişa, dido k̆ai futbolci var eç̆opuşa k̆ampişa mendaxtu. Ligişi ç̆ut̆a tak̆imepe k̆ampepeşa goiktanşk̆ule  mʒikati didi t̆ak̆imepe na naşkvanen futbolcepe uondraman. Beki ar jur k̆ai futbolci ok̆açxe eç̆opasen, iri-xolok hea imedams.

Ridvan Özkurt

İrfan Çağatay Aleksishi - irfancagatay@hotmail.com


Facebook'ta Paylaş