• MyPassion
Rizenis Havaalani
01/01/2001 01:00

Na golaptit dolonepes başbakan Recep Tayyip Erdoğanik dobadona muşişa goiktert̆uşk̆ule Rizenis ar havaalani oxenuşeni endverepes dobuurcu.

Muk̆o ǯana ren Rizes ar havaalani oxenuşeni ambaepe eǯemagnet̆es. Ama T̆amt̆ra do Batumişi havaalanepeş gurişeni ham projepe mitik mole va moğamt̆u. Başbakanişi gamatkvalute Rizenis havaalani oxenu xolo mole komolaxtu do fizibiliteş raporepe oxenapus kogeiç̆k̆inu.

Rizenişi noğaş k̆onseiş Havaalaniş jin oçalişuşi grubişi eza Emin Toprakik “2013-işi kʒalaş gamolvurişakis T̆amt̆raş havaalanişa 1.472.676 magzaluri kogextu. K̆at̆a ndğas T̆amt̆raşa 7012 magzaluri gyulun. T̆amt̆raşa na gyulun ham magzalurepeşi %35 p̆rosent̆i Rizenarepe renan. Yani ar ndğaşi 2103 magzaluri Rizenişa mulun.”-ya do Rizenis havaalani na diç̆in mole komoliğu.

Gamak̆vateri na va ren ambaepes haşo ren ki, havaalani Art̆aşeni do Atinaş aras, haǯi Hamidiye na itkven Sap̆uşi zenis ixeninasen.

İrfan Çağatay Aleksishi - irfancagatay@hotmail.com


Facebook'ta Paylaş