• MyPassion
Oqataloni Xalqepeş Derneğik (GfbV) Lazepeşeni Memorandumi Xazirums
01/01/2001 01:00

Göttingenis na gedgin Germanuri k̆oç̆inoburi xak̆epeş derneğik, mteli kianaş moç̆ut̆era xalk̆epeşi etnik̆uri, nenuri do oceruri xak̆epe moip̆icams do meserya memorandumepete ham ok̆ataloni xalk̆epes mteli kianas oçkinapams. 

Haǯi Oşkenani-Yulva (Ortadoğu) norteşi tigemçanu Dr. Kemal Sidoşi goǯancğonerobate en ogine Turkienuri do Okorturanuri Lazepeşi haǯineri xalepeşeni memorandumi gamanç̆arasen. Haşote Lazepeşi tarixi do k̆ultura mtel Germanuri xalk̆epeşi ozmonus oǯiranen. 

GfbV-şi endverepes, haǯineri Turkienuri, Germanianuri do Okorturanuri Lazi akt̆ivist̆epeşi nena do k̆ult̆ura oskedinuşeni na ikuman dulyapes haşote mxuci meçamu do oçinapu guris uğunan.

GfbV-s na içalişams do ek̆rabape muşiti Viǯes na skidunan Kaan Orhoni K̆azeta Ağani Muruʒxişeni ambaepe haşo momçes: ’GfbV nak̆u ǯanaşen doni Turkieşi moç̆ut̆era xalk̆epeşi, nenapeşi oçvaluşeni dido dulyape ikums. Lazepes iri k̆ale; mektebi do ofiʒialuri dairepes nena nişi axmaran-ya do Lazi akt̆ivist̆epeşi onç̆eşinupes haşote mxuci meçamu meşonums.”

Turkienuri Lazepeşi xalişen gale, GfbV-k Kortu nasyonalist̆epeşi ’Kartvelizmi’ na bucoxamt; Lazepe Kortu nasyonişi ar noǯile do Lazuri nenati Korturi nenaşi dialekti na şinums tezepeti omç̆ipalasen.

İrfan Çağatay Aleksishi - irfancagatay@hotmail.com


Facebook'ta Paylaş