• MyPassion
MEB-ik Lazuri Nenaşi Ogurapuş Programi Qabuli Dovu
01/01/2001 01:00

Na golaptit bulobaşi geç̆k̆apuris Lazuri Enst̆ut̆ik, Boğaziçiş Universiteşen ak̆ademisyenepeşk̆ala na xazires Lazuri Nenaşi Ogurapuşeni Programi “Milli Eğitim Bakanluği (MEB) Talim Terbiye Kurulu”-s komeçudort̆un. Ağustozişi çodinuris Talim Terbiye Kurulik Enst̆ut̆işi meçameri Lazuri  Nenaşi Ogurapuş Programi k̆abuli dovu. Enst̆ut̆işi tigemçanu Mehmet Bekaroğluk “Haǯişa Lazuri nenas ‘Lazuri Ogurapuş Programi va ren’-ya do goludgitut̆es. Açkva Lazuriş ogurapuşeni mutu endoli va doskidu. Velepes unonanna berepes Lazuri dersepe naçinanen. Lazuri nena açkva ofisialurot test̆ik̆i dixeninu”-ya tku.

Ham programi Lazuri Nena mektebepes ogurapuşeni dido beciti ar p̆roseduri rt̆u. Ham programite açkva Lazuri nena maxutanişen maorvani k̆lasepeşakis ogurapuşeni k̆anunuri mutu problemi do endoli va doskidu.

Ar mektebis 10 mamgure Lazuri nena kogoşaʒxunesna mektebişi mudiri him dersi ok̆itxapuşi ren. Lazuri nenaşi dersepe nena na uçkin, namuti ren branşişen ar mamgurapalepek ok̆itxapasen.

 

Hanǯo ogurapuş programi k̆abuli divunati, dersepeş goşaʒxunuş sezoni golaptit bulobas na içoduşeni, hanǯoneri ogurapu-onǯopuluş ǯanaşe Lazuri nena mektebepes xolo va rt̆asen do enni ǯoxle, ǯana ham oras dobağine mamgure kiz̆iraşk̆ule dersepe gyoç̆k̆asen.

İrfan Çağatay Aleksishi - irfancagatay@hotmail.com


Facebook'ta Paylaş