• MyPassion
Arkabişi Golas Tçareri Kvalepe Kidziru
01/01/2001 01:00

Arkabi do Viǯeşi şkas na ren Sirtyaylaşi golas, jindo ç̆areri do ğareri let̆as na dorçun didi kvalepe kižiru. Mç̆k̆eşepek na moxvades kvalepeşi jin çkva do çkva k̆ai na var gamisvaren figurepe, ç̆ara na nugams ğarerepe do simadepe gamik̆aten. Kvalepeşi ist̆oriaşeni mitis mutu var uçkun do varti sp̆eʒialist̆i arkeologepes užirunan. 

Jur-sum tuta ǯoxle ham kvalepeşi ožiramu do arşivişa ezdumuşeni TRT-şen ar grubi komoxtu do kvalepe video do fotope kogamuğesnati ham videope haǯişakis soti va gamaxtu.

p̆ikt̆ografişi ar çeşidi na nugams ğarerepeşeni arkeologiuri do ist̆oriuli omç̆ipolu diç̆irs. Ama TRT-şen gale varti Artvinişi varti Rizenişi muzepes ambari uğunan ham kvalepeşen. Kvalepe na užiramun Viǯuri ar fotografist̆ik "Kvalepeşi yeri mitis va buǯumert, hemuşeni ki, xazina na goruman bazi k̆oçepe kognanna ham kvalepe kožiruman do dot̆axuman."-ya do kvalepeşi oşinaxuşeni ordoşa ar çare ožiramu na diç̆irs oxomoǯonapes.

İrfan Çağatay Aleksishi - irfancagatay@hotmail.com


Facebook'ta Paylaş