• MyPassion
Ağani Lazuri Spori: Pitsari Araba
01/01/2001 01:00

Mek̆alesk̆iritis Laz Ralli, Dutxes FormuLazi

Red Bullişi finansorobate hanǯo maxutani fara Redbull FormuLaz piʒari arabaş yarişepe 18 Ağustozis Dutxes dixeninu. 600 met̆roni p̆ark̆uris 67 p̆iʒariş araba na untxozu yarişiş oseiruşa çinoberi motorsik̆letiş maktale Kenan Sofuoğlu do Art̆aşenurepe do dido dido turistepeti komextes. Txaş tomaşi ǯinek̆i, cizlavet̆i do k̆ask̆epete moǯopxeri maktalepeşi didope parkuriti p̆ri oçodines, arabapeşi mazu do burbalepe na nut̆roxes do na ingrinesşeni disk̆alifiye dies. Kenan Sofuoğluti arabaşi mazu na nut̆roxuşeni araba muşi moinimsk̆u do p̆ri açodinuşa yarişişen disk̆alifiye divu.

Oseironi do oxoktoni orape na goliçvinu yarişis ombruma mç̆ima mç̆imu. Meç̆ireli p̆ark̆uris Erkan Kurtuli maartani, Serkan Kurtuli majurani do Bilal Kaptaniti masumani ivu. 

Mek̆alesk̆iritisti 10 Ağustozis Laz Ralli coxote masumani fara na ixeninu piʒari arabaş yarişepe Dutxuri yarişepesteri oseironi ivu.  Oxorza do komoliş k̆ategorite 42 şuri na amaxtu yarişepes dido maseirepe uonurt̆u.  Freniş sist̆emişen gale met̆aluri ağalya na var ixmarinu piʒari arabape 700 met̆roni k̆ulvaris artik̆arti golaxtimuşeni inç̆işes. 

Yarişiş pist̆is Lazuri tabela do ucimeçamoni ç̆arapete moǯopxeri rt̆u. 

Em ogi oxorz̆alepeş k̆ategoris yarişepe divu. Ham k̆ategoris 34 ǯaneri Nazmiye Orali keç̆opu. Komoluri yarişepesti Bilal Kaptani maartani divu. Yarişepe ǯana xolo ora muşis ixeninasen.

İrfan Çağatay Aleksishi - irfancagatay@hotmail.com


Facebook'ta Paylaş