• MyPassion
"Çkimişeni Gemzuli Va Rtha"
01/01/2001 01:00

Mteli k̆analepes ek̆oonamt̆aşa, mt̆k̆aş doloxe ar t̆oba k̆ele ar biç̆i do ar k̆ulanişi xe ok̆ok̆limeri artikart̆is “Ma si qorop” do “ez ji te hezdikim”-ya do oropa muşi otkuten kogyoç̆k̆u.

Otxo k̆itas (k̆ont̆inent̆is) na nunç̆uşun ar k̆analis haşo ar saxneş oz̆iramu dido k̆ai domaǯonu. Fragmanis ağani na gyoç̆k̆asen “Benim İçin Üzülme” (Çkimişeni Gemzuli Var T̆a) coxoni serialişen nortepe oǯiramt̆es.

Ar Lazi biç̆i (Niyazi) do Lazonaşa çai oǯiluşeni moxtimeri ar Kyurdi k̆ulanişi (Buke) oropa do p̆aramitepe na oǯirasen çinoberi direktori Mahzun Kırmızıgülişi direktorobas na doloç̆aru dizi ik̆inaçxas ekranepeşa na moxtasen gamacoxinapamt̆u. Fragmanis “ma si qorop” otkuten Xopuri dialekti na ixmarasen konignu, mara Mahzun Kırmızıgülisteri çinoberi ar direkt̆ori na doloç̆arums serialis Lazuri nena çkuni nak̆o sva z̆irasen mati meraği dop̆i.

Ik̆inaçxas milyonepete maseire k̆oçisteri mati ATV-ş k̆analis seiri dop̆i. Serialis Lazuri dialogepe dido k̆ai var ignert̆u, mara Lazuri muzik̆epe mboli mboli ignert̆u. Marsisik na ibiru Kortuli birapa ‘Deda’-şen Lazurişa goktimeri “Nana” dido mskva komoǯopxesdort̆un. Mteli maseire k̆oçepe bgaras gyoxunu ham birapak. Dizişuk̆ule internetis Lazuri nenaşi xasilapes ham birapak “moǯondinu” do “gopau”-şi rek̆orepe mtel dot̆axu.

Lazepes ham seriali dido moǯondesdort̆un. “Niyazi” do “Buke”-şi dido guris meç̆oni p̆aramitepe muç̆o naonasen do muç̆o içodasen mtelis meraği domaves. Açkva ik̆inaçxapes mtelik televizyonis kodolobaonit.

Seriali xvala Lazepeşi doloxe var, mteli Turkies dido isinapinu, akt̆orepe, art̆ist̆epe, dialekt̆epe, k̆ult̆uruli mot̆ifepe, oskedinu dido isinapinu do inç̆arinu, k̆ai do xai dido k̆ritik̆epe itku do inç̆aru. Haşo çinoberi ar direkt̆oriş direkt̆orobas haşo didi ar projes Lazuri nenaşi oxmarinu kimis k̆ai var aǯonu. Internetis gedgeri Lazuri xasilapes dizi dido moǯondes do serialişi nortepe internetis gompines. Serialiş videope do Lazuri birapape xasilapeş azapesti dido moǯondes do gopines. Moǯondinu do gompinuşi rek̆orepe eç̆opu ham serialik ar jur saat̆iş doloxe. Lazuri xasilapes mxuci meçamuten do rek̆lamiten seriali k̆aixeşa konignu Turkies do iptineri norte fara do fara televiziyonis koǯires.

Hakşakis televizionis dido serialepe ort̆u, mara Lazuri nenas hak̆o k̆imeti meçameri ar seriali va rt̆u. Lazuri birapapek̆ala Margaluri birapapeti na iç̆andinen seriali Lazuri nenas, k̆ult̆uras do oskedinus k̆imeti mepçamt-ya mesaji meçamt̆u. Akt̆orepe do art̆ist̆epe ğalepeşi oxoşkveri oçaçxalinusti mxuci meçamt̆es, noğas gulurt̆es, imçvirt̆es, xalk̆iş doloxe rt̆es açkva.

Serialis iri çkvaneri dizepesteri geç̆areriş derdepe uğurt̆u. Lazuri nenas didi oropaten haşo ikomt̆ui, vana Lazuri nena açkva para mogamt̆ui, mitis var uçkin.

Seriali dido moiǯondinuşkule Arabuli devletepeşi televizioniş k̆analepekti goik̆itxes seriali. Serialiş p̆roduksionis Arabuli k̆analepes serialişa gamaçamu do geç̆areli mogapu k̆ai daǯonu. Serialiş informaʒia nonç̆aramt̆esk̆oşk̆ule Laziş coxo na gejiles do Lazepeşeni “Oineturi Turkepe” na nonç̆ares Lazuri xasilapek ognesşk̆ule Lazepes guri dut̆roxes. Lazuri ar xasilak, serialişi ofiʒialuri xasilaşen ar “oxat̆iroba” var moxtaşa, serialiş ambaepe var geidvinasen-ya do gamacoxu. Serialişi ofiʒialuri xasilaşenti hakşakis “oxat̆iroba”-şeni mutu var inç̆aru. Seriali çxalvaş tutaşk̆ule xolo ekranepeşa moxtasen, mara haǯişkule mupe ivasen orak moǯiranen.

İrfan Çağatay Aleksishi - irfancagatay@hotmail.com


Facebook'ta Paylaş